कार्तिक,१५ शनिवार
गुल्मीको, मुसिकोट नगरपालिका वडा नं ६ कुर्घामा अवस्थित मालिका मन्दिरमा विगतका वर्षहरुमा जस्तै यस वर्ष पनि कार्तिक पूर्णिमाको अवसर पारी आयोजना हुँदै आएको मेला यस वर्ष कार्तिक आजदेखि देखि १९ गतेसम्म हुँदैछ ।
परापूर्वकाल देखि नै यहाँ चिच्याएर बर माग्ने मेला लाग्ने गर्दछ । यस वर्ष योग परेका कारण विगतका वर्षभन्दा भक्तजनहरूको सङ्ख्या बढी हुने अनुमान गरिएको मन्दिरका मुख्य पण्डित टीकाराम उपाध्यायले बताउनु भयो ।
तिहारपछिको पूर्णिमा मालिका मेला लाग्ने गर्दछ भने उक्त पूर्णिमा कार्तिक महिनाभित्र परेमा जोग परेको मानिने प्रचलन रहेको छ । उक्त प्रचलन अनुसार योग परेको समयमा मन्दिरमा पूजा गरेर वर मागेमा मालिका माईले पूरा गरिदिने जनविश्वास रेहेको मानिन्छ ।
परापूर्व कालमा मालिकाको जङ्गलमा तपस्वी ऋषि आई जङ्गलकोबीचमा तपस्या गरेपछि त्यस जङ्गलमा पानीको अभावले काकाकुल भएका जंगली जनावरलाई पानी वरदान पाएको र शक्ति प्राप्त गरेको किंवदन्तीमा उल्लेख रहेको सो वडाका वडा अध्यक्ष खड्क बहादुर खड्काले बताउनु भयो ।
मालिके बजै कानले नसुन्ने बहिरी भएकाले भक्तजनले मालिका मन्दिरमा पानी खस्ने ठाउँ नजिकै पुगेर चिच्याएर आफूले चाहेअनुरूप वर मागेमा बज्यैले पूरा गरिदिने जनविश्वास रहेको छ । यही विश्वासका कारण यहाँ हरेक वर्ष तिहारपछिको पूर्णिमा मेलामा हजारौँ भक्तजन वर माग्ने मेलामा सहभागी हुने गरेको पाइन्छ ।
यहाँ परापूर्व कालदेखि नै बर माग्नका लागि नेपालका विभिन्न जिल्लासहित भारतबाट समेत भक्तजन आउने गरेको स्थानीयहरु बताउँछन् । यो वर्ष विगतका वर्षमा भन्दा बढी भक्तजन बर माग्नका लागि मेलामा सहभागी हुने अपेक्षा गरिएको मेला व्यवस्थापन समितिका सचिब दीपक थापाले बताउनु भयो ।
मेलालाई थप आकर्षक बनाउन खुल्ला वडा स्तरीय भलिवल प्रतियोगिता,खुल्ला एकल रेकर्ड नृत्य प्रतियोगिता, घैटोफोर, भाले छोपाई, कुर्चिदौड प्रतियोगिता तथा कार्तिक १७, १८ र १९ गते राष्ट्रिय कलाकारहरु प्रीति आले, डिप्लभ खाति, सम्झना रणपाल, बबिता धिताल, कमल बराल, मदन गोतामे बिश्वकर्मा, बिनिता परियार लगायत स्थानिय कलाकारहरुको प्रस्तुति साथै कुर्घेली भजन समुहको भजन प्रस्तुत समेत गरिने कार्यक्रम रहेको त्यहाँका युवा अभियन्ता हाल जापानमा कार्यरत हिरा थापाले बताउनु भयो ।
खुल्ला वडा स्तरीय भलिवल प्रतियोगितामा २ जना सम्बन्धित वडा बाहेक बाहिरी खेलाडी समावेश गर्न सकिने गरि खेल तय गरिएको खेल संयोजक सुमन विकको भनाई छ ।
मेला व्यवस्थापनका लागि सरोकारवालाको भेलाबाट छलफल गरि मेला व्यवस्थापन, शान्ति सुरक्षा लगाएत आवश्यक तयारी गरिएको बताइएको छ ।
