काठमाडौं- वर्तमान सत्तागठबन्धन बनेपछि प्रधानमन्त्री पुष्पकमल दाहाल प्रचण्ड र एमाले अध्यक्ष केपी ओलीले मात्रै १८ पटक भेटवार्ता गरेका छन् । अधिकांश भेट बालुवाटारमा भएका छन् भने केही भेट बालकोट, सिंहदरबार र खुमलटारमा भएका छन् ।

गठबन्धन निर्माणको क्रममा पुस १० गते प्रचण्ड र ओलीबीच बालकोटमा भेट भएको थियो । त्यसयता पुस २७, माघ २, माघ २५ गते ओली र प्रचण्डबीच बालकोटमा भेटवार्ता भएको छ । पुस १३ गते खुमलटार र माघ २६ गते सिंहदरबारमा भेटवार्ता भएको छ । पुस १५, १९, २० २४, २८ गते, माघ १०, १२, १८, २१, २४ गते र फागुन ४ गते दुवैबीच बालुवाटारमा भेटवार्ता भएको छ । दुवैबीच एउटै विषयमा भेटवार्ता भइरहेको छ । तर निकास निस्किएको छैन ।

ओली प्रधानमन्त्री भएका बेला प्रचण्डको दिनहुँ बास बालुवाटारमा हुन्थ्यो । बिहान, दिउँसो, बेलुका ओलीसँगको भेटमै प्रचण्डको दिन बित्थ्यो । अहिले ओलीले दिन बिराएर भेटवार्ता गरिरहेका छन् । विषय त्यही राष्ट्रपतिमा सघाउनुपर्ने हो । यदि नेपाली कांग्रेसले प्रधानमन्त्रीलाई विश्वासको मत नदिएको भए अहिले प्रचण्ड बालकोट धाइरहेका हुन्थे । ओलीले जे जे भन्यो, त्यही मान्नुपर्ने हुन्थ्यो । तर अहिले परिदृश्य फेरिएको छ ।

कांग्रेसको विश्वास मत पाएपछि ओली बालवाटार धाइरहनुपरेको छ । यसकै पूर्वाभास पाएरै संसदमा प्रधानमन्त्री प्रचण्डले विश्वासको मत लिने बेला ओलीले भनेका थिए– ‘यदि विना स्वार्थ कांग्रेसले विश्वासको मत दिने निर्णय गरेको भए ठिकै हो । तर ढोक्सामा माछा पर्छ कि भनेर थापेको भए प्रस्ट भए हुन्छ, ढोक्सामा माछा पर्दैन, रित्तै हुन्छ ।’

कांग्रेसले विश्वासको मत दिएको दिनदेखि नै ओली खुलेर हाँस्न सकिरहेका छैनन् । त्यसमाथि माओवादीमा एमालेसँग निकट भएका नेताहरू अहिले गुमनाम छन् । वर्षमान पुन विरामी परेर फेरि चीन गएपछि ओलीसँग नरम भएका नेता बाहिर देखिएका छैनन् । अहिलेको गठबन्धन टुटाएर पुरानै गठबन्धन बनाउनुपर्ने प्रचण्ड, जनार्दन शर्मा, शक्ति बस्नेत, गिरिराजमणि पोखरेल, देवेन्द्र पौडेलको लाइनमा नारायणकाजी श्रेष्ठ र कृष्णबहादुर महरा पनि मिसिन आइपुगेकाले केही दिनमै माओवादीले बोल्ड डिसिजन गर्ने बुझिएको छ । माओवादीमा एमालेलाई राष्ट्रिपति दिन नहुनेमा एकमत देखिएको छ ।

वर्तमान सत्ता समीकरणमा भूमिका खेलेका माओवादी केन्द्रका उपाध्यक्ष नारायणकाजी श्रेष्ठ अहिले प्रधानमन्त्री पुष्पकमल दाहाल प्रचण्डकै लाइनमा उभिएका छन् । प्रचण्डलाई एमाले अध्यक्ष केपी ओली निवास बालकोटसम्म लैजाने श्रेष्ठ अहिले ओलीसँग असन्तुष्ट बनेका छन् । जुन कुरा उनले एकीकृत समाजवादीका अध्यक्ष माधवकुमार नेपालसँग खोलेका छन् । केही दिनअघि नेपालसँगको भेटमा उनले ‘ओली बेइमान’ भएको टिप्पणी गरेका थिए । –  मिडिया डबली