काठमाडौं – १७ वर्षअघि सशस्त्र माओवादी द्वन्द्वका बेला एमाले नेता वामदेव गौतम रोल्पा पुगे । माओवादी अध्यक्ष पुष्पकमल दाहाल प्रचण्ड, बाबुराम भट्टराईसहितलाई भेटेर शान्तिपूर्ण राजनीतिमा आउन तत्कालीन सरकारको सन्देशसहित गौतम रोल्पा पुगे ।
उनीहरूबीच भेटवार्ता भयो । त्यसको केही समयपछि माओवादीले सशस्त्र द्वन्द्व रोकेर शान्तिपूर्ण राजनीतिमा आउने घोषणा गर्यो । माओवादीले कृष्णबहादुर महरा, देव गुरुङ र दिनानाथ शर्मालाई वार्ता गर्न काठमाडौं पठायो ।
त्यो सबै वामदेवकै सल्लाहमा भएको थियो । १७–१८ वर्षअघिको प्रचण्ड, बाबुराम र वामदेवको केमेस्ट्री यतिखेर आएर मिलेको छ । अर्थात् बाबुराम र वामदेव माओवादीको चुनाव चिह्न हँसिया हथौडा लिएर चुनावमा जाने भएका छद् ।
बाबुराम नेतृत्वको नेपाल समाजवादी र बामदेव गौतम नेतृत्वको नेकपा एकता राष्ट्रिय अभियानले हसिया हथौडाबाट निर्वाचन लड्ने भएका छन् । दुवै पार्टीका नेताहरु आगामी निर्वाचनमा माओवादी केन्द्रको चुनाव चिह्न हँसिया हथौडाबाट निर्वाचन लड्ने भएको हो ।
मंगलबार बसेको माओवादी केन्द्रको स्थायी कमिटी बैठकले दुवै दललाई निर्वाचन चिह्न प्रयोग गर्न दिने निर्णय गरेको हो । भट्टराईले २०७४ मा कांग्रेससँग गठबन्धन गरेर गोरखा–२ बाट प्रतिनिधि सभा सदस्य जितेका थिए। आफ्नो पार्टी कमजोर मात्र होइन, टाट पल्टिएपछि बाबुराम र वामदेव माओवादीको सहारा लिएर चुनाव लड्न लागेका हुन् ।
एमाले छाडेर हालै नयाँ पार्टी खोलेका वामदेव र माओवादीलाई हैसियत देखाउन अर्को नयाँ शक्ति पार्टी खोलेका बाबुराम आखिर शीतलता खान माओवादीको शरणमा पुगेका छन् ।
बाबुराम मधेसी दल माडेर माओवादीमै फर्किने तयारीमा छन् । वामदेवले बर्दिया छाडेर प्युठानबाट चुनाव लड्ने र त्यसमा आफूलाई सहयोग गर्न प्रचण्डसँग सर्त राखेका छन् ।
तर यसपटक त्यो सम्भावना निकै कम छ । किनभने प्युठानमा राजमो र कांग्रेसमध्ये एकले निर्वाचन जित्ने प्रबल सम्भावना छ ।- मिडिया डबली
प्रतिक्रिया
सम्बन्धित खवर
