काठमाडौं । नेकपा एमालेका अध्यक्ष केपी शर्मा ओलीले आफूसँग उपचार गर्ने पैसासमेत नभएको बताएका छन् ।आफ्नो र श्रीमतीको नाममा रहेको घर र जग्गा दान गरिसकेको बताउँदै उनले उपचारका लागि आवश्यक परेमा त्यसलाई बेच्न पनि नसक्ने बताए ।आज काठमाडौंमा आयोजित एक कार्यक्रममा उनले सांसद भएकाले अलिअलि पैसा त आउने तर त्यसले आफ्नो उपचार गर्न नपुग्ने बताए । आफ्नो र श्रीमतीको नाममा रहेको सम्पत्ति राज्यको भइसकेको बताउँदै उनले भने, ‘तपाईंहरुले उपचार गर्दिनुभयो भने हुन्छ । मैले मेरो घरजग्गा बेच्न पनि पाउँदैन । किनभने दान गरिसकेको छु ।’

यो पनि पढ्नुहोस् – काठमाडौं । आसन्न प्रदेशसभा र प्रतिनिधीसभा चुनावको मिति सरकारले मंसिर ४ गतेका लागि तोकेको छ । योसँगै अहिले सिंगो देश चुनावमा होमिएको छ । शीर्ष नेताहरु को कहाँबा चुनाव लड्लान् र जित्ने सम्भावना कति होला भनेर चासो समेत बढेको छ ।

यसैबीच, प्रतिनिधिसभामा चितवन क्षेत्र नम्बर ३ मा माओवादी केन्द्रका अध्यक्ष पुष्पकमल दाहाल प्रचण्ड उम्मेदवार बन्ने लगभग पक्का छ । उनले सार्वजनिक रुपमै यो क्षेत्रबाट चुनावमा ओर्लिने तयारी गरिसकेका छन् । यही बेला त्यही क्षेत्रबाट प्रचण्डलाई तनाव हुने खबर बाहिरिएको छ ।नेपाली कांग्रेस, चितवनको असन्तुष्ट समूहले माओवादी केन्द्रका अध्यक्ष प्रचण्डविरुद्ध उम्मेदवारी दिने तयारी गरेको छ । सत्तारुढ पाँचदलीय गठबन्धनले ४ मंसिरको प्रदेश र प्रतिनिधिसभा निर्वाचनमा तालमेल गर्ने निर्णय गरेको छ ।

स्थानीय निर्वाचनमा पनि कांग्रेसले गठबन्धनमा रहेका दलहरुसँग तालमेल गर्दै भरतपुर महानगरपालिकाको मेयर प्रचण्डकी छोरी रेनुलाई समर्थन गरेको थियो । रेनुविरुद्ध जगन्नाथ पौडेललाई स्वतन्त्र उम्मेदवार बनाएको कांग्रेसको असन्तुष्ट पक्षले प्रतिनिधिसभा पनि उम्मेदवारी बनाउने तयारी गरेको छ ।

कांग्रेस पूर्वसभापति सुशील कोइरालाको ८३ औं जन्मजयन्तीका अवसरमा ‘कांग्रेस शुद्धीकरण अभियान’को नामबाट छलफल कार्यक्रम राखेको सो समूहले भदौ २४ गते बीपी जयन्तीको अवसरमा उम्मेदवार घोषणा गर्ने तयारी गरेको जनाएको छ ।

यो समूहका नेता एवं कांग्रेसका पूर्व जिल्ला सभापति कृष्णलाल सापकोटाले अरु कोही तयार नभए आफू एक्लै भएपनि चुनावमा उम्मेदवार बन्न तयार रहेको घोषणा गरे । ‘कांग्रेसका मतदाताले चुनाव चिह्नमा रुखमा मत हाल्न नपाउने अवस्था फेरि आएमा म कांग्रेसका तर्फबाट चुनाव लड्न तयार छु,’ नेता सापकोटाले भने, ‘यसमा तपाईंहरु सबैको साथ रहने नै छ ।’ अहिले सत्ता गठबन्धन ‘काले काले मिलेर भाले खाने गठबन्धन’ भएको उनको टिप्पणी छ ।कांग्रेसका पूर्वसांसद भीमबहादुर श्रेष्ठले कांग्रेस वामपन्थीले दिएको लौरो टेकेर हिँड्नुपर्ने दयनीय अवस्थामा पुगेको टिप्पणी गरे । नेता श्रेष्ठले भने, ‘कांग्रेसलाई बलियो बनाउन कुनै पनि कदम चाल्न पछि हट्दैनौं, भोलि पनि उठ्छौं ।’

भरतपुरको मेयरमा बागी उम्मेदवार बनेका पूर्वसांसद जगन्नाथ पौडेलले गठबन्धनका नाममा चितवनमा कहिलेसम्म माओवादीलाई बोकेर हिँड्नुपर्ने भनी प्रश्न गरे । उनले आफूहरु माथि अपमानित र थिचोमिचो भएकोले जिल्लाभर यसको प्रतिवाद हुने बताए । तरुण दल चितवनका पूर्वअध्यक्ष शम्भु अर्यालले कांग्रेसको जिल्ला नेतृत्व पैसा र लोभलालसामा फसेको टिप्पणी गरे ।

कार्यक्रममा कांग्रेस नेता मीना खरेलले अहिलेको सत्ता गठबन्धन लोकतन्त्रको मर्मभन्दा बाहिर भएको टिप्पणी गरिन् । ‘अहिलेको यो गठबन्धन कांग्रेसको विधान, संविधानको मर्म र जनताको भावनाभन्दा बाहिर गएर सत्ता स्वार्थमा लिप्छ छ,’ खरेलले भनिन् ‘पाँच बर्षसम्म कांग्रेस भनेर बस्ने, तर भोट चाँहिँ माओवादीको हसिँया हथौडामा हाल्नुपर्ने ? यो दुर्भाग्य कहिलेसम्म ?विवाद समाधान समिति गठनः सिट बाँडफाँटबारे निर्णय नहुँदै असन्तुष्टिका स्वर सुनिन थालेपछि चितवन कांग्रेसले भने विवाद समाधानका लागि तीन सदस्यीय समिति बनाएको छ ।

केन्द्रीय सदस्यद्वय टेकप्रसाद गुरुङ, दिनेश कोइराला र पूर्व जिल्ला सभापति रामकृष्ण घिमिरे रहेको समितिले पार्टीभित्रका असन्तुष्ट नेता तथा कार्यकर्तामाथि गरिएको कारवाही अविलम्ब फिर्ताका लागि जिल्ला, प्रदेश र केन्द्रमा लिखित रुपमा अनुरोध पत्र पठाउने निर्णय गरेको एक नेताले जानकारी दिए ।असन्तुष्ट पक्षले अलग्गै भेला गर्ने थाहा पाएपछि सो समितिले विज्ञप्ति जारी गर्दै कारवाही फिर्ताका लागि आफूहरूले पहल थालेकाले कुनै पनि विचार समूहको नाममा अलग गतिबिधि नगर्न र पार्टीकै मूलधारमा समावेश हुन आग्रह गरेको थियो ।

पूर्व जिल्ला सभापति रामकृष्ण घिमिरेले गत स्थानीय चुनावदेखि भुईंकटहर समूहका नाममा हुँदै आएको अलग्गै गतिविधि अबदेखि नगर्न असन्तुष्ट पक्षलाई आग्रह गरेका छन् ।

तर, असन्तुष्ट पक्षका नेताहरुले समितिले गरेको यस्तो आग्रहको कुनै तुक नभएको बताए । असन्तुष्ट समूहकी नेता मीना खरेलले पार्टीले गठन गरेको समितिले अहिलेसम्म आफूसँग छलफल गर्ने हिम्मत नगरेको बताइन् । ‘हामीमा लोभ छैन, निष्ठापूर्वक लागेका छौं, उहाँहरुले के गरेर लाग्नुभाछ उहाँहरुले जान्ने कुरा हो, फेसबुक र बक्तब्यवाजीले समस्याको समाधान हुँदैन’ उनले भनिन् ।