काठमाडौं । लोकप्रिय सञ्चारकर्मी रवि लामिछाने संसदीय चुनावमा उम्मेदवार लड्ने चर्चाका बीच उनका साक्खै दाजु हरिशरण लामिछाने पनि चुनावी दौडमा सामेल भएका छन् ।


रेडियो नेपालका पुराना समाचारवाचक लामिछानेले काठमाडौं वा काभ्रेबाट स्वतन्त्र उम्मेदवारी दिने अनौपचारिक घोषणा गरेका हुन् ।दुई दिनअघि सामाजिक सञ्जालमा लामिछानेले आफूलाई अन्तस्करणले सिंहदरबारबाट बाहिरिएर देश र जनताको सेवामा फरक भूमिकामा पेस हुन प्रेरित गरेको बताएका थिए ।

‘परिवर्तन सम्भव छ भन्ने मान्यतासहित आगामी संसदीय निर्वाचनमा प्रतिस्पर्धा गर्ने तयारीमा छु, सबैको साथ र समर्थनमा यो अभियानमा होमिने छु,’ उनले लेखेका छन् । नेपाल प्रेससँगको कुराकानीमा लामिछानेले आफू काभ्रे वा काठमाडौंमध्ये एक जिल्लाबाट चुनाव लड्ने बताए ।

उनको गृहजिल्ला काभ्रे हो भने कार्यक्षेत्र काठमाडौं हो ।  काठमाडौं–२ वा काभ्रे–२ मध्ये एउटा रोज्नुपर्ला, साथीभाइहरूसँग छलफलपछि निर्णयमा पुग्छु,’ उनले भने ।

केही स्वतन्त्र उम्मेदवारहरूले टिम नै बनाएर अगाडि बढ्ने गृहकार्य गरिरहेकाले पनि आफूले पर्खेको लामिछानेले बताए । ‘म कसैसँग सम्पर्कमा त आइसकेको छैन, तर स्वतन्त्रहरू मिलेर जाँदा राम्रो हुन्छ भन्नेमा म पनि सहमत छु,’ उनले भने ।हरिशरणका भाइ रवि लामिछानेले पनि चुनावमा उठ्नेबारे गृहकार्यमा छन् । हरिशरणले भने रवि चुनाव लड्ने सम्भावना कम रहेको संकेत गरे ।

‘उसको कुरा पनि पहिलेदेखि नै आइरहेको छ । तर, मेरो विचारमा उसले अहिले चुनाव लड्दैन होला । भर्खरै टेलिभिजन सेट अप भइरहेको छ । त्यहाँ उसको जिम्मेवारी हुन्छ । त्यो नै उसका लागि प्लेटफर्म हो नि जनताको काम गर्ने,’ लामिछानेले भने ।

चुनावमा उम्मेदवार बन्ने विषयमा दाजुभाइबीच सरसल्लाह नभएको उनले बताए । ‘भाइसँग मेरो छलफल भएको छैन । यदि हामी दुवैले उम्मेदवारी दियौँ भने पनि त्यसलाई स्वभाविकरुपमै लिनुपर्छ,’ लामिछानेले भने ।

सेयर गर्नुहोस
  •  
  •  
  •  
  •  
  •  
  •  
  •  

LEAVE A REPLY

Please enter your comment!
Please enter your name here