काठमाडौं । नेकपा एमालेका उपाध्यक्ष विष्णुप्रसाद पौडेलले चुनावपछि केपी शर्मा ओलीले नयाँ सरकारको नेतृत्व गर्ने दाबी गरेका छन् । उनले परमादेशबाट विस्थापित भएका ओलीलाई जनादेशबाट पुनर्स्थापना गरिने बताए ।
बझाङमा आयोजित एमालेको जनसभामा बोल्दै पौडेलले देश विकासका लागि एमाले सरकारको विकल्प नभएको उल्लेख गरे ।
उनले भने, ‘एमाले बाहेक अरू पार्टीको सरकार बन्दा यो जिल्लामा लाखका, करोडका आयोजना आएका होलान्, तर अर्बका आएका छन्, छैनन् । तर, जब एमाले सरकारमा आउँछ, लाख करोड होइन अर्बौँका आयोजना आउँछन् ।’
केपी ओली प्रधानमन्त्री बन्दा चैनपुर ताक्लाकोट सडकलाई मात्रै एक अर्ब ४० करोड रुपैयाँ बजेट छुट्टाइएको उनले स्मरण गरे ।
‘एउटै सडकलाई एक अर्ब ४० करोड बजेट छुट्याउन एमालेको सरकारले मात्रै सक्छ । त्यसैले देश विकासका लागि एमालेको सरकार चाहिएको छ,’ उनले भने ।
अहिले चैनपुर ताक्लाकोट सडक अवरुद्ध भएको भन्दै यसलाई एमाले सरकार आएर सुचारु गर्ने बताए ।
उनले भने, ‘अबको चुनावपछि ओली गठबन्धनको होइन, एमालेको एकल बहुमतको प्रधानमन्त्री बन्नुहुन्छ । यदि यो सडक पूरा होस भन्ने चाहनुहुन्छ भने एमालेलाई साथ दिनुस् ।’
एमालेका अगाडि कुनै पनि गठबन्धन नटिक्ने दाबी पौडेलले दाबी गरे ।
‘यस्ता गठबन्धन एमालेले धेरै पटक देखिसकेको छ । कस–कसले गठबन्धन गर्न सक्छन् गरे हुन्छ । कुनै गठबन्धनले एमालेको विजय यात्रा रोक्न सक्ने छैन । एमालेका अगाडि कुनै पनि गठबन्धन टिक्न सक्ने छैन,’ पौडेलले भने ।
पौडेलले गाउँ–गाउँमा कांग्रेस र माओवादीलाई एक्लै चुनाव लड्ने हिम्मत छ कि छैन भनेर सोध्न कार्यकर्तालाई आग्रह गरे ।
उनले भने, उनीहरूलाई सोध्नुस्, एक्लै चुनाव लड्ने हिम्मत छ ? उनीहरू भन्नेछन्– छैन । र, एमालेलाई यसरी विजयी बनाउनुस् कि अर्को चोटि एमालेविरुद्धमा कसैले उम्मेदवारी दिने हिम्मत गर्ने छैन ।’
प्रतिक्रिया
सम्बन्धित खवर
