काठमाडौं । नेकपा एकीकृत समाजवादीका अध्यक्ष माधवकुमार नेपालले अहिले नेकपा एमाले छाड्ने लहर चलेको दाबी गरेका छन् ।
पार्टीनिकट महिला संघले आयोजना गरेको भेला तथा प्रशिक्षण कार्यक्रममा आफ्नो पार्टीले ६ महिनामै पाएको सफलता अरुले नपाएको बताए । ‘हामी ६ महिनामै ७७ वटै जिल्ला, अधिकांश पालिका र अधिकांश वडाहरूसम्म फैलिएका छौं । अधिकांश ठाउँमा हाम्रो कमिटी विस्तार भइसकेको छ’, नेपालले भने ।
एमाले छाडेर एसमा आउनेको लहर चलेको भन्दै उनले थपे, ‘अहिले देशभर एमाले छाड्ने लहर चलेको छ, हाम्रो पार्टी प्रवेश गर्ने महाअभियान चलिरहेको छ । अहिले म जहाँ गइरहेको छु त्यहीँ भीड हुन्छ । जहाँका हल पनि साँघुरा हुन्छन्, कुर्ची कम पर्छन् । भुइँमै फम र कार्पेट बिछ्याएर बस्नुपर्छ । हिमाल, पहाड, तराई जताततै भीडैभीड छ ।’
नेकपा एस क्रान्तिकारीधारमा हिँडेको भन्दै उनले एमाले दक्षिणपन्थी बाटोमा भासिएको आरोप लगाए ‘एमाले दक्षिणपन्थी बाटोमा भासिएको छ, हामी अग्रगामी क्रान्तिकारी बाटोमा छौं । त्यसैले एमाले छाडेर हाम्रो पार्टीमा प्रवेश गर्नेहरू बढ्दै गएका छन् ।’
एमालेभित्र अध्यक्ष केपी शर्मा ओलीको निरंकुशताविरुद्ध विद्रोह गरेको एकवर्ष पूरा भएको भन्दै नेता नेपालले पार्टी अझ मजबुत बनाउने संकल्प गरे ।
प्रतिक्रिया
सम्बन्धित खवर
