सन्तोष महतारा-गुल्मी / जिल्ला प्रशासन कार्यालय गुल्मीमा आलोपालो प्रणालीबाट सेवा सुचारु हुने भएको छ ।
कर्मचारीहरुमा कोरोना भाइरसको संक्रमण पुष्टि भएपछि सेवा बन्द भएको जिल्ला प्रशासन कार्यालय गुल्मीमा बुधबार देखि केही मात्रा र आइतबार देखि आशिंक मात्रामा केही सेवा सुचारु हुने जिल्ला प्रशासन कार्यालय गुल्मीले जनाएको छ ।
बुधबार देखि जिल्ला प्रशासन कार्यालय गुल्मीबाट राहदानी बितरण, दलित, आदिवासी जनजाति र पेन्सन सम्बन्धिका कागजात प्रमाणित गर्ने सेवा सुचारु हुने सहायक प्रमुख जिल्ला अधिकारी हरि प्रसाद गैरेले जानकारी दिए ।
साथै आउँदो आइतबार देखि जिल्ला प्रशासन कार्यालय गुल्मीमा आलोपालो प्रणालीद्धारा आशिंक रुपमा केही मात्रा सेवा सुचारु हुने सहायक प्रमुख जिल्ला अधिकारी गैरेले बताए ।
उनका अनुसार जिल्ला प्रशासन कार्यालय गुल्मीले आइतबार र सोमबार रुरुक्षेत्र गाउँपालिका, सत्यवती गाउँपालिका, कालीगण्डकी गाउँपालिका र चन्द्रकोट गाउँपालिकाका सेवाग्राहीलाई सेवा दिने दिन तोकिएको छ ।
त्यस्तै मंगलबार र बुधबार मुसिकोट नगरपालिका, मालिका गाउँपालिका, मदाने गाउँपालिका र इस्मा गाउँपालिकाका सेवाग्राही सेवा दिइने छ । साथै बिहिबार र शुक्रबार रेसुङ्गा नगरपालिका, गुल्मीदरवार गाउँपालिका, धुर्कोट गाउँपालिका र छत्रकोट गाउँपालिकाका सेवाग्राहीलाई सेवा दिने सहायक प्रमुख जिल्ला अधिकारी गैरेले जानकारी दिएका छन् ।
तर, जिल्ला प्रशासन कार्यालय गुल्मीबाट राष्ट्रिय परिचयपत्र र राहदानीको विवरण दर्ता भने अर्को सुचना जारी नहुन्जेलसम्म नगरिने जिल्ला प्रशासन कार्यालय गुल्मीले जानकारी गराएको छ ।
मतदाता नामवलीको विवरण संकलनका लागि निर्वाचन आयोगको कार्यालयमा सम्पर्क राख्न पनि जिल्ला प्रशासन कार्यालय गुल्मीले अनुरोध गरेको छ । – सुसम न्युजबाट
प्रतिक्रिया
सम्बन्धित खवर
