राजविराज । सप्तरीको खडक खोलाको पुल निर्माणमा भारतीय पक्षले अवरोध पुर्याएको छ । हुलाकी सडक आयोजना अन्तर्गत डाक्नेश्वरी नगरपालिका वडा नम्बर ६ कटैयामा निर्माण थालिएको खड्क खोलाको पुलमा भारतीय सीमा सुरक्षा बदल (एसएसबी)ले अवरोध पुर्याएको हो ।
हुलाकी आयोजनाले ८ माघ २०७६ मा इलाइट कन्स्ट्रक्सन प्रालि काठमाडौंसँग यो पुल निर्माणका लागि सम्झौता गरेको थियो । सम्झौता भएपछि कन्स्ट्रक्सनले प्राविधिक कर्मचारी, कामदार र उपकरण ल्याएर काम शुरु गर्न खोज्दा एसएसबीले अवरोध पुर्याएका हुन् ।
हुलाकी आयोजनाका साइट इन्जिनियर आशुतोष कर्णका अनुसार ११२ मिटर लम्बाइ र ११ मिटर चौडाइ भएको पुल बनाउने तयारी छ । पुल निर्माणका लागि रु १८ करोड ३३ लाख (भ्याटसहित) मा ठेक्का लागेको छ । पुल बनाउने भनेर पारी भारतीय गाउँ करियौर र नेपालतर्फका कटैयाका बासिन्दाका बीचमा छलफल हुँदा पुल बनाउने सहमति दिइएको बताउँदै कर्णले त्यही अनुसार नेपाल सरकारले ठेक्का लगाएको बताए ।
तर, सीमा नजिकै पुल बनिरहेकाले भारतीय पक्षले दुबै देशको सहमतिमा बन्नुपर्ने अडान लिएको उनले बताए । कर्णले भने, ‘यसबारेमा भौतिक पूर्वाधार मन्त्रालयमा जानकारी गराउन लागेका छौं ।’
नेपाली भूमीमा नेपाली पक्षले बनाउन लागेको पुलमा भारतीय सीमा सुरक्षा बल (एसएसबी)ले अवरोध पुर्याउँदा काम ठप्प भएको छ ।
‘म आफैं पनि गएर एसएसबी र त्यहाँका डिएमसँग यसबारे कुरा गरेको छु,’ प्रमुख जिल्ला अधिकारी शंकरहरि आचार्य भन्छन्, ‘हामीतिरकै भूमी रहेको नक्सा समेत देखाएको छु । तर, भारतीय पक्ष माथिल्लो तहबाट टोली बोलाउने भनिरहेका छन् ।’
पारी भारतीय गाउँ करियौर गाउँका बासिन्दाले पनि पुल निर्माण हुन लागेको जग्गा नेपालकै भएको बताइरहँदा पनि उताका डिएमले यो विषयमा निर्णय लिन नसकेको आचार्यले बताए । ‘मेरो क्षेत्राधिकार डिएमसम्म कुरा गर्ने हो,’ प्रजिअ आचार्यले भने, ‘बाँकी गतिविधीबारे गृहमन्त्रालयलाई जानकारी गराइसकेको छु ।’
आचार्यले यो समस्याको समाधान परराष्ट्र मन्त्रालय मार्फत् हुने बताए । उनले दुई देशबीच छलफल भएर पुल निर्माणको काम चाँडै अगाडि बढ्ने विश्वास समेत व्यक्त गरे ।
यो पनि पढ्नुहोस्
गुल्मी- जिल्लाको गुल्मीदरबार गाउँपालिकाले गाउँपालिका भित्रका ७ वटै वडामा पुगेर अपाङ्ग परिचयपत्र वितरण गरेको छ ।
गाउँपालिका भित्र रहेका अपाङ्गता भएका नागरिकहरुको पहिचान गर्ने तथा राज्यबाट प्राप्त सेवा सुविधाबाट बन्चित हुन् नपरोस् भन्ने उद्देश्यले वडा स्तरबाटै ४१ जनालाई परिचयपत्र बितरण गरिएको प्रमुख प्रशासकीय अधिकृत लक्ष्मण पाण्डेले जानकारी दिए ।
जसमा महिला १५ जना र पुरुष २६ जना रहेको गाउँपालिकाले जनाएको छ । जसमा ‘क’ वर्गका महिला दूई जना र पुरुष एक गरी तीन जना छन् । ‘ख’ वर्गका महिला चार जना र पुरुष छ जना गरी १० जना छन् । ‘ग’ वर्गका महिला सात जना र पुरुष १४ जना गरी २१ जना छन् । ‘घ’ वर्गका महिला तीन जना र पुरुष चार जना महिला गरी सात जना छन् । योसँगै गाउँपालिकामा अपाङ्ग परिचयपत्र लिनेको संख्या २८३ जना रहेको पाण्डेले जानकारी दिए ।
परिचयपत्र वितरणको लागि सञ्चालन गरिएको घुम्ती शिविरमा गाउँपालिकाका अध्यक्ष अशोककुमार थापा, उपाध्यक्ष मिना भण्डारी, मेडिकल अधिकृत डा। आषुस रिजाल, स्वास्थ्य शाखा प्रमुख नारायणप्रसाद अर्याल लगायत कर्मचारीहरुको उपस्थिती रहेको थियो ।
