काठमाडौं । आगामी मंसिर चार गते हुने प्रदेश र प्रतिनिधि सभा निर्वाचनका लागि स्वतन्त्र उम्मेदवारहरुले साझा चुनाव चिह्न र साझा घोषणापत्र सार्वजनिक गर्दै छन् ।

यसलाई उनीहरुले ‘स्वतन्त्र तथा वैकल्पिक शक्तिको लौरो अभियान’ नाम दिएका छन् । यही अभियान अन्तर्गत आज दिउँसो २ ललितपुरको सानेपास्थित हेरिटेज गार्डेनमा साझा चुनाव चिह्न र साझा घोषणापत्र सार्वजनिक गर्न लागिएको अभियानका संयोजक सुमन सायमीले जानकारी दिए ।

२०७८ वैशाखको स्थानीय तह निर्वाचनमा लौरो चुनाव चिह्नबाट प्रतिस्पर्धा गरेका केही स्वतन्त्र उम्मेदवारहरु विजयी भएपछि यसले चर्चा पाएको छ । काठमाडौं महानगरपालिकाको मेयरमा विजयी बालेन्द्र साह (बालेन) र धरान उपमहानगरपालिकाको मेयरमा विजयी हर्क साम्पाङको चुनाव चिह्न लौरो थियो ।

‘स्वतन्त्र तथा वैकल्पिक शक्तिको लौरो अभियान’को संयोजन गरेका सायमीले काठमाडौंको मेयरमा आँखीझ्याल चुनाव चिह्नबाट प्रतिस्पर्धा गरेका थिए । १३ हजार ७७० मत पाएका उनी चौथो स्थानमा रहे ।

बालेन मेयरमा निर्वाचित हुँदा सायमी पनि विजय जुलसमा सहभागी भएका थिए । उनी अब प्रतिनिधि सभा निर्वाचनमा काठमाडौं क्षेत्र नम्बर ८ बाट प्रतिस्पर्धा गर्ने तयारीमा छन् । – अनलाईनखबरबाट