काठमाडौं – अन्ततः नेपालका कथित राष्ट्रवादीहरू चिसो पानीमै नुहाउनुपर्ने अवस्थामा आइपुगेका छन् ।

अमेरिकी सहयोग परियोजना एमसीसी संसदबाट अनुमोदन गर्न ‘व्याख्यात्मक घोषणा’ गरेर जाने सत्तारुढ गठबन्धनमा आन्तरिक सहमति भएको छ ।आज बस्ने प्रतिनिधिसभा बैठकले सम्भवतः एमसीसीबारे ठोस निर्णय गर्ने बुझिएको छ । त्यसका लागि दिउँसो १ बजे प्रतिनिधिसभा बैठक बोलाइएको छ ।

माओवादी केन्द्र र एकीकृत समाजवादी छोड्नुपर्ने डरले एमसीसी पास गर्न राजी हुनु र एमाले अध्यक्ष केपी ओलीले १४ सांसद नहटेसम्म एमसीसीको पक्षमा मतदान नगर्ने अडान लिएपछि नेपाली कांग्रेसका महामन्त्री गगन थापाले बीचको बाटोबाट एमसीसी अनुमोदन गर्नसकिने बाटो सुझाएका थिए ।

सोहीअनुसार अब संसद्ले ‘व्याख्यात्मक घोषणा’ गरेर संसदबाट अनुमोदन गर्ने तयारी छ । एमसीसीबारे अनुमोदन गर्ने विषयमा थप छलफल गर्न माओवादी केन्द्रको बैठक बसिरहेको छ ।

एकीकृत समाजवादीले पनि सचिवालय बैठक बोलाएको छ । सत्तारुढ गठबन्धन दलमा एमसीसीका बारेमा ‘व्याख्यात्मक घोषणा’सहित अनुमोदन गराउन मञ्जुर देखिएपछि एकीकृत समाजवादीले सचिवालय बैठक बोलाएको हो ।

सम्भवतः दुई दलले आज एमसीसीबारे निर्णय गर्ने छन् । कांग्रेस नेता थापाले धेरैअघि संकल्प प्रस्ताव र व्याख्यात्मक घोषणा गरेर एमसीसी अनुमोदन गर्न सुझाव दिएका थिए ।

तर, थापाले दिएको विकल्पबारे प्रचण्ड र माधव नेपालले सहमति जनाएनन् । तर, अन्तिममा आएर गगन थापाकै लाइनमा देशको राजनीति अघि बढ्ने भएको छ ।

एमसीसीबारे प्रश्न उठेका विषयमा अन्तर्राष्ट्रिय अभ्यासअनुसार व्याख्यात्मक घोषणाको मस्यौदा तयार भएको छ । सत्ता गठबन्धनका शीर्ष नेताहरूबीच व्याख्यात्मक घोषणा गरेर एमसीसी पारित गर्ने सहमति भएबमोजिम तयार पारिएको मस्यौदा केहीबेरमा प्रधानमन्त्री शेरबहादुर देउवालाई बुझाउने तयारी भइरहेको छ ।

अन्तर्राष्ट्रिय कानुनका विज्ञ गोविन्द बन्दीसमेतको संलग्नतामा यो मस्यौदा तयार पारिएको हो । यसअघि परिमार्जनबिना कुनै हालतमा पारित गर्न नहुने निर्णय लिएका माओवादी केन्द्रका अध्यक्ष प्रचण्ड र एकीकृत समाजवादीका अध्यक्ष माधवकुमार नेपाल व्याख्यात्मक घोषणा गरेर एमसीसी पारित गर्ने पक्षमा सहमत भएका हुन् । – मिडिया डबली