चुनावको मिति घोषणा भएसँगै ढोरपाटनमा नेकपा (एमाले) प्रवेशको लहर चलेको छ । नगरपालिकामा हरेक दिनजसो अन्य पार्टी परित्याग गरी एमालेमा प्रवेश गर्नेको लहर चलेको एमाले ढोरपाटनले जनाएको छ ।

यही क्रममा बिहिबार नगरपालिकाको वडा नं ४ धाइबाङमा नेपाली कांग्रेस, माओवादी केन्द्र, राजमो परित्याग गरी १ सय २६ जना कार्यकर्ता नेकपा एमालेमा प्रवेश गरेको वडा कमिटी अध्यक्ष उमेश श्रीपालीले जानकारी दिनुभयो । नव प्रबेशीहरुलाई गण्डकी प्रदेश सदस्य तथा ढोरपाटन नगरपालिकाका प्रमुख देव कुमार नेपालीले अविर र खादाले स्वागत गर्नुभएको थियो ।

सो अवसरमा बोल्दै नगरप्रमुख नेपालीले एमाले बिना देश र जनताको समृद्धि असम्भव रहेको जनाउँदै एमाले प्रति विश्वास गरेर देशैभर एमालेमा प्रवेश गर्नेको लहर चलेको दावी गर्नुभयो । केपि ओली नेतृत्वको सरकारले जनहित र राष्ट्रहितको काम गरेकाले प्रतिगामी तत्वहरु मिलेर षड्यन्त्रपूर्वक सरकार ढालेको जिकिर गर्दै उहाँले अबको निर्वाचनमा तीनै तहमा एमालेको सरकार बन्ने वातावरण बनिसकेकाले यसलाई रोक्न कसैले नसक्ने ठोकुवा गर्नुभयो ।

नवप्रवेशीहरुले दलित, गरिब, उत्पिडित र पछाडि परेका वर्गको उत्थान गर्न नेकपा एमालेले मात्र सक्ने भन्दै आफुहरु एमालेमा प्रवेश गरेको बताएका छन् । वडा कमिटी अध्यक्ष उमेश श्रीपालीको अध्यक्षतामा सम्पन्न कार्यक्रममा गण्डकी प्रदेश सदस्य दधीराम अर्याल, जिल्ला कमिटी सचिवालय सदस्य गणेश कुमार थापा ,नगर कमिटी सचीव ज्ञानप्रसाद कँडेल लगायतको आतिथ्यता रहेको थियो ।

यसैबीच आज पनि ढोरपाटन नगरपालिका ७ र ८ बाट करिब ३० जनाभन्दा बढी कार्यकर्ता राष्ट्रिय जनमोर्चा परित्याग गरि नेकपा एमालेमा प्रवेश गरेको नगर सचिव ज्ञानप्रसाद कँडेलले जानकारी दिनुभयो ।